អំពីបណ្ណាល័យ
សាវតារបណ្ណាល័យ គ.ជ.អ.ប.
បណ្ណាល័យ គ.ជ.អ.ប. ត្រូវបានបង្កើតឡើង ចាប់តាំងពីឆ្នាំ២០១០ ដោយមានការគាំទ្រថវិកាពីធនាគារអភិវឌ្ឍន៍អាស៊ី(ADB) ក្រោមគំនិតផ្តួចផ្តើមដ៏ខ្ពង់ខ្ពស់របស់ សម្តេចក្រឡាហោម ស ខេង អតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន គ.ជ.អ.ប. ក្នុងគោលបំណង ដើម្បីចងក្រង រក្សាទុក និងផ្សព្វផ្សាយពីប្រវត្តិសាវតារកំណែទម្រង់វិមជ្ឈការ និងវិសហមជ្ឈការ ឬហៅថាកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដោយផ្តោតជាសំខាន់ទៅលើការផ្ទេរសិទ្ធិអំណាច មុខងារ ធនធាន ទៅឱ្យរដ្ឋបាលថ្នាក់ក្រោមជាតិក្នុងការផ្តល់សេវា និងការអភិវឌ្ឍសេដ្ឋកិច្ចមូលដ្ឋាន ដើម្បីឆ្លើយតបទៅនឹងតម្រូវការរបស់ប្រជាពលរដ្ឋឱ្យកាន់តែមានប្រសិទ្ធភាព គុណភាព តម្លាភាព និងគណនេយ្យភាព។
បណ្ណាល័យ គ.ជ.អ.ប. និងបណ្ណាល័យអេឡិចត្រូនិក គ.ជ.អ.ប. ( https://library. ncdd.gov.kh/ ) គឺជាយន្តការមួយយ៉ាងសំខាន់នៃ ការធ្វើឱ្យប្រសើរឡើងក្នុងការប្រាស្រ័យទាក់ទង និងការចែករំលែកព័ត៌មានឱ្យបានទូលំទូលាយ និងទាន់ពេលវេលាអំពីចក្ខុវិស័យ ក្របខណ្ឌច្បាប់ និងក្របខណ្ឌនៃការអនុវត្តកម្មវិធីជាតិជូនដល់ក្រសួង ស្ថាប័ន រដ្ឋបាលថ្នាក់ក្រោមជាតិ និងអ្នកពាក់ព័ន្ធនានា។
បណ្ណាល័យ គ.ជ.អ.ប. និងបណ្ណាល័យអេឡិចត្រូនិក គ.ជ.អ.ប. ស្ថិតនៅក្រោមការគ្រប់គ្រងរបស់លេខាធិការដ្ឋាន គ.ជ.អ.ប. និងមានឯកសារប្រមាណ២ម៉ឺនចំណងជើងឯកសារ អំពីគោលនយោបាយ ច្បាប់ លិខិតបទដ្ឋានគតិយុត្ត កម្មវិធីជាតិ របាយការណ៍សិក្សា ឯកសារពាក់ព័ន្ធនឹងកំណែទម្រង់នានា ព្រមទាំងឯកសារមួយចំនួនទៀតពាក់ព័ន្ធនឹងវិទ្យាសាស្ត្រ បច្ចេកវិទ្យា សង្គមវិទ្យា ភាសា ប្រវត្តិសាស្ត្រ ភូមិវិទ្យា សាសនា ទស្សនៈវិទ្យា។ល។
ដំណើរការ
បច្ចុប្បន្នបណ្ណាល័យ គ.ជ.អ.ប. មានទីតាំងនៅក្នុងអគារទីស្តីក្រសួងមហាផ្ទៃ ជាន់ផ្ទាល់ដី(G) ប៉ែកខាងត្បូងនៃច្រកចូលអគារ ស្ថិតនៅលើមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ព្រះរាជាណាចក្រកម្ពុជា។ បណ្ណាល័យ គ.ជ.អ.ប. ចាប់បើកដំណើរការពីម៉ោង ០៨:00ព្រឹក - ០៥:00រសៀល រៀងរាល់ថ្ងៃចន្ទ ដល់ សុក្រ។
ក្រៅពីការចូលមកទស្សនា និងអានឯកសារនៅបណ្ណាល័យផ្ទាល់ សម្តេច ឯកឧត្តម លោកជំទាវ លោក លោកស្រី អាចស្វែងរកឯកសារខាងលើតាមរយៈគេហទំព័រនេះ និងអាចចូលរួមផ្តល់ជាមតិយោបល់ និងការស្នើសុំនានាតាមរយៈអ៊ីម៉ែល: info@ncdd.gov.kh លេខទូរសព្ទ: +៨៨៥ ៩៥ ៣៥៥ ៤៥៤ រាល់ម៉ោងធ្វើការ៕